فلاشية اليسار والجمل الثوريه والوردانى وسيرة حدتو

26 يناير

ما بين العامين  فترة اقتربت من تجاوز العام بين الاحتجاز فى قضية التعديلات الدستورية وواحتجاز فى  أحداث غزة التعديلات الدستورية وشوش لأول مرة بعد ما قضينا تلات تيام في التنقل ما بين النيابة والدراسة والضاهر طلعت وحكيت لبعض الأصدقاء تفاصيل الرحلة ، ساعتها قالو لى بعض الزملاء ما تحكى عن الروح اللي كانت سايدة بينكم وعن بعض التفاصيل وبعدها بسنه قررت أحكى ملاحظات عامة وتفاصيل عن بعض الوجوه والبشر والإحداث يمكن متكونش حاضر كلها بس هحاول افتكر أحكى وافتكر ،لكن أكيد تفاصيل أحداث غزة لسه في دماغي  يمكن اللي هقوله مش مهم أو بالطبع هو مش مهم ولاة هدعى أهميته يعنى بس حبيت احكي لكيم . التعديلات الدستورية ومحمود الوردانى وسيرة حدتو  أتقبض علينا ساعة التعديلات الدستورية وعلى ما افتكر كان معنا شباب من الأخوان المسلمين محمد عادل والولد بتاع مدون ميت واد متهور ضارب حبتين بس  بحس انه طيوب على راى أخوتنا الفلسطينيين ،ومين تانى الولاه مصطفى نجيب سرور وخالد عبد الحميد وعمى محمود الوردانى القصاص والصحفى  ود عبد الخالق  فاروق وعلى وهو شاب ممكن تقول انه ماركسى والله ما فكر اسمه على اية وحد صاحبة، بس هو ولد جدع  بس ساعات دماغه بتقفل ويبقى ارثوكسى وغير قابل للنقاش  وعندة ردود افعال مسبقة ،  بيفكرنى ببعض النماذج اللى قابلتها من حزب العمال الشيوعى   لان حزب العمال دة كان فيه ناس صلبة جدا وليها روح نضالية واخرين زى على كدة وكمان كان فى كريم ولد من الغد روحه  عبقرية وولد تانى برضو غداوى بس  يعععععععع ع ام النرجسية والبرنايو  وحد تانى دخل السياسة ع أرضية الطائفية والاتنين دول يا بوى ع اهلهم حاجة كده كرعه، بس اتلمو وبطلو قرف فى بعض المواقف يعنى مش ديما ، ومين افتكر الواد بهاء صابر اة والله كان هناك وكان رائع فى الغناء والقاء الشعر وإنسان طيب لحدود كبيرة ، وناجى رشاد العامل بتاع شركه المطاحن المهم أتمسكنا يا اصدقائى من عند مكتبة مدبولى اصل أحنا ايه لمى الدنيا كانت مقفلة  فى مظاهرة التحرير نزلنا مجموعة محدودة في الشارع لفينا شارع شريف وطلعنا منه ع ناصية عبد الخالق ثروت بعدها  طلعنا ع ايه طلعت حرب ومنها أتقبض علينا وكان في المجموعة دى  محمد عادل وانا  و عبد الخالق فاروق ومحمود الوردانى على ما افتكر وشباب تانى مش فاكر اسميهم اة وعبد الخالق فروق وساعتها قعدنا نهتف فى الشوارع عن عمال المحلة وعن تعديل الدستور وعن الغلاء وعن فلسطين وعن المقاومة وعن التوريث وغيرها من الموضيع  يعنى تظاهرنا سيرا ع الاقدام اكتر من 20 ساعة والامن  بدا يتعقبنا من عبد الخالق ثروت .وطلعنا ع عربية الترحيلات بت … فاكر امها لمى ركبتها اول مرة فى حياتى لوحدى فى اوله جامعة كان يوم زى الزفت ما علينا  ،بدأنا التعارف طبعا أنا كنت اعرف بعض الناس بس الوردانى كنت قريت ليه  بس معرفوش ولاة كنت اعرف عبد الخالق فاروق أساسا  بس  تلاتة كلموني ع اعتبار انه رمز والنبي ساعتها كنت حاسس أنى مش عايش او مقصر فى حقي نفسي  بس  عادى معرفوش  مش قضية يعنى ،بس لاحظت شابين من كفاية مهورين بيه ما علينا  بس فى حديثة طلع عارف اليسار كويس لا وكمان بتفاصيل المنظمات يعنى بس بتاعة زمان  يناير والمؤتمر والعمال وكدة بس طبعا كل دول فى الضياع  خلاص بح فى اطار الذكريات  ،والولاه محمد طبعا هرب كاميرا وقعد يصور فينا ونشرهم ع المدونة، بس لأنه حلقى  وعصوبى ههههههه وشوية حاجات مقلش كل تفاصيل الموضوع فى البرنامج التثقيفي اللي نظمتة  فى الحجز .طبعا مكنش ممكن محدش يجى الندوة أو يهرب من المناقشة ،يهرب فين دا أحنا فى حجز يا أبا الحج ، بقى أخوكم عمل ايه استغل الموقف واسترجع تجارب الشيوعيين القدامى  فى السجون، بس هما كانوا بيتسجنو بجد وبيعانى من القهر فى السجن سجن بجد مش  دلع زى اليومين دول – يعنى اليومين دول  بيدخلك معجون أسنان وسجاير وشباشب واكل ولحوم خلى العيال تأكل دول بيناضلوا يا حبة عيني – وساعات حد يطلع كده من الحجز اللى قضى فيهم الكام ساعة ولاة الكام يوم  ويعمل نفسه بطل ،اة مش ناسى وانا قدام اسانسير  نقابة الصحفيين وواحد من الأشاوس اللى اتمسكو كام يوم قال “مش كل اللى يتحبس اة احنا كنا رجالة” طبعا انا اعرف الواد دة والتخريب اللى بيعملة ورغم فضحته مش بيتردد انه يحوم حولين بعض الناس، بصتله بقرف وسكت وافتكرت ذكريات الواحاتواللى قرايت عنه واللى بيتحكى  وتخيلت عمى محمود عباس الفلاح الشيوعي والسعيد جمال الدين وعبد الرحمن هاشم وماهر سمعان وعلى عامر وقلت ربنا يخلد ذكراكم محدش آداكم حقكم  فى الذكرى  اة يرحمك يا عمى الشيخ السعيد جمال الدين – حكى ليا عمى محمود ان عساكر الواحات “على ما افتكر” اتلمو ع زميل وضربوة بجريد “بسلة” يعنى بجريد غير منزوع الشوك عشان لقيوة معاة قلم رصاص  ،وواحدة من بتوع اليومين دول قال ايه طلبت تغير نوع السجاير وهى في الحبس  عشان هى مش بتشرب النوع دة  يعنى مثلا مارلبور ابيض  لا عاوزة احمر مثلا مثلا يعنى ،طيب والنبي احنا بتوع اليومين دول مدلعين اة والله  يعنى منهم اللى بيطلع من الحجز ويطلع يعتبر نفسه شخصية عامة او يبقى شخصية عامة وهو مثال للجهل النشط والتسطيح واطلاق الكلمات كالبغبغان ، بجد لا مش كدة وبس دا ممكن يعمله سبوبة ويبزنس،  طيب ملعون ابوك زمن مشوه وملعون أبو الجمل الثورية اللي مبتراكمش غير الوهم  واحساس كاذب وأبطال من ورق.يوةةةةةةةة طلعتكم من الموضوع معلش معلش قليل الادب لسانى فالت بقى جنوبى حاد معلش ، بقى لمى لقيت الزملاء ولقيت عمى محمود الوردانى قلت فرصة نعمل برنامج تثقيفى  ونفيد بعض بدل ام  الصمت او  الحديث بدون جدوى . أتكلمت بصوت باسم بعد الاتفاق مع الوردانى  وصرحت بصوت جهورى كدة ” يدعوكم مركز افاق اشتراكية الى برنامج  زنزانة الحجز وهنبدى  بندوة حول كتاب تحت النشر للرفيق محمود الوردانى  وحضور فاعليات الزنزانة اجبارى” فضحكم الشباب قدمت عمى محمود عشان يتكلم عن كتابة حدتو سيرة منمة شيوعية وبعد عرض للكتاب بدأنا النقاش عن الدور الوطنى للشيوعيين المصرين وتاريخ حدتو كاكبر منظمة شيوعية وكتيار خلق امتداد وتاثير حقيقى سواء اختلفنا او اتفقنا على مدى هذا التاثير واكد الوردانى عبقرية تنظيم حدتو وجهدها فى القضايا الوطنية والعمل الجماهيرى وقدرتها على الربط بين الاجتماعى والوطنى وفى نفس اليوم أتكلم  العامل ناجى رشاد عن شركة المطاحن والهموم العمالية ودة كان قبل اضراب الشركة وكان ناجى ساعتها سايب الغد جديد ع ما افتكر ومكنش ليه توجهات ولاة حاجة وقعدنا نتناقش وشباب الغد تانى يوم اتكلمو عن الغد وبرنامجهم والمشاكل اللي يوجهوها وفى نفس اليوم عملنا حلقة نقاشية حول النضال من تشي جيفارا الى سي بن لادن وكان الشباب بتوع الاخوان مشتبكين فى القضية لانهم هما اللى طلبو النقاش حول  المقاومة ودخلنا منها لفكرة الصهيونية و الكفاح المسلح فى العراق وفلسطين وفكرة المقاومة نفسها بعدها أتكلمنا عن مشكلة  المهمشين وسكان العشوائيات وأطراف المدن وانا بحكم المعايشة والاهتمام كنت بستحوذ ع الحديث واتكلمنا ساعتها عن مشكلة الجدار العازل الطبقى العنصري فى دار السلام  سكنى القديم وع ما افتكر تأنى يوم للإفراج عنا كان تحرك للاهالى دار السلام قدام مجلس الدولة بلافتات مكتوب عليها 300 الف مواطن اقل من مستثمر واحد ورددنا ساعتها وأنا معهم “بحكم انى من سكان المنطقة ” شعارات ضد حكومة راس المال اللى بتظلم فى العمال – وشعارات تانية عن حق الاهالى فى الطريق وضد  استيلاء المستثمرين على أراضى الفقراء .وفى النيابة دة أخر يوم كلنا اجتماعنا فى اوضة واحدة عشان التحقيق وكان فى عدد كبير من المحامين افتكر منهم سيدة من مركز الحرية وسيد من سواسية وست زى القمر محامية اة والله مش فاكر اسمها  بس رائعة بجد شكلها بنت ناس وافتكر أن  حد بعد كدة قالى انها من مؤسسة المراة الجديدة  اة ،لا مواخذة دى انطباعات مش معاكسة والله، وكان فى محامين مش عارفهم طبعا غير المحامين المعتادين فى الشحتته ورا  كل اللى يتمسك !أجمل شى كانت الروح الجميلة اللى كانت موجودة رغم حالة التنوع والاختلاف وبصراحة الناس الرخمه سابو  اوضة الحجز وراحو الاوضه اللى جنبنا والناس اللى جنبنا لمى كانو بيتعبوا من الناس الرخمين هههههههه كانو يجو عندنا  اة ويشتكو بهمس، اصل كان فى اربع عيال الكل اتفق ع رخامتهم ورخامة أهلهم مش لأنهم جهلة ومدعين وبس كمان روحهم يعععععععع حاجة لا تطاق  يا رب مش مشكلة الواحد يتحجز ما الدنيا كلها سجن بس ما اتحجزش مع حد رخم يعنى مش  السلطة والرخيمين، الهم انى اعرفوا رخامة السلطة ورجالها وهذا قدرا رضينا به لحين  اما رخامة  النزلاء فذاك امر عصيب !  غزة ونقاء الأخوان وفلاشيه اليسار والجمل الثورية  المرة الثانية ساعة غزة وعلى رأى اللى بيقول اهو كله بيقول وناس بتقول وناس ليها موقف وناس بتاجر بس ليا شويه انطباعات بصراحة لمي شفت الأخوان قلت يعنى النقاء دة اللي جوى الشباب الى زى الفل دول والناس المخلصة مخلصة بجد لدرجة أن  حد قال “انا طالع وعارف انى ممكن اتاخر ومش مشكلة لو اتاخرت سنة او اتنين !” هذا النقاء الثورى مبيخرجش عشان لقمة العيش خسارة بجد ان اليسار ضايع فى ظرف تاريخى يحتم وجودة ،صحيح بدا يشد الحيل بس ام الجمل الثورية والتجارة وشغل السيما لسه اليسار مغموس فيه لسه بيتكلم فى الفسحة ما علينا جت غزة اتكلمت مع بعض الزملاء والناس أتناقشت  وتانى يوم كانت مبادرة التحالف الاشتراكى وقفة للتحالف الاشتراكى ووفد شعبى  للجامعة العربية ومبادرات اخرى من اماكن وقوى اخرى ،  بس طبعا مين هيسبنا  نزلنا واتقبض عليا انا وأستاذ صلاح عدلى مدير مركز افاق اشتراكية  وبعدها بدقايق  اتقبض على ام العيون جناين يجرى فيها الهجين المناضلة الرائعة  شاهندة مقلد وأستاذ عادل المشد رئيس مجلس ادارة جريدة البديل ياة كنت هنسى عمنا عبد الغفار شكر المتحدث باسم التحالف الاشتراكى وقطب من اقطاب حزب التجمع ووفد التحالف اللي أتقبض على مجموعة منه تم ترحيلة الى معسكر الدراسة ولمى اتصلوا مسؤلين الجامعة العربية عن وفد التحالف اللى أتأخر رد عليهم د مجدى عبد الحمييد  عضو لجنة العمل اليومى بالتحالف وقلهم” بصو من شباك الجامعة وانتو تعرفو الوفد تم القبض عليه” هههههههه!! مسخرة بلدنا  والله بس عادى أحنا فى مصر ؟!ومنعوا حتى تواجد المفكروالمناضل الشيوعى محمود أمين العالم فى الميدان ومنعو وصولة الى مكان الوقفة امام جامعة الدول العربيه وابلغوة بان لا داعى لإحراجهم لان في أوامر بمنع اى تحرك وأتمسك كمان من الشباب الاشتراكي عمرو يوسف فى نفس اليوم ركبنا العربية ولفو بينا فى وسط البلد ولمي جت الأوامر ودونا ع معسكر الدراسة وفى العربية طبعا كنت أنا “واعوذ بالله من كلمة احم احم  ” وأبا الحج الرفيق صلاح عدلي مع مجموعة كبيرة من الأخوان  شباب وموظفين تنوعيه ، كان واضح أنهم مش من القاهرة من محافظات وباين أنهم من محافظات عديدة وإنهم ميعرفوش بعض ، لكن سرعان ما بدوا يتعرفو  لمى بدا احدهم فى الدعاء.في غرفة الحجز اخدو  طبعا الموبايلات طبعا مننا مش أزمة  يلاه بلا موبيل بلا صداع المزة كده كده مش هتتصل وباردة يا عالم هتقول نام أو مشغول ومش هتفكر فى حاجة كدة ولاة كدة اة اصلى مودب مودب يا ناس احم  . وقعدنا ركنت الحزمة وحجزت سرير بالجاكت  اللى معيا  وريحت بص عمى صلاح قلى يعنى ريحت قلتلة هعمل اية انا دماغ ادينا قاعدين  شويه/بس ومعرفتش اركح فى ام السرير  قمت اصدع الرفيق اة ما هو اللى باقى والباقى اخوان ممممممم  اقري فى الجور نال  كانت تصريحات المصري اليوم وإخبارها توحى بان النظام مش هيسمح باى تحرك أساسا وكانو فى حالة تحدى مع الأخوان المسلمين اللى اعلنو التصعيد وبدا الحركة وجمع ناس معهم  قالو عليهم قوى سياسية  ومعرفش كانو بيمثلو مين معرفش حقيقى ، جابو الراجل اللى اللى عمل بلاغ بهدف ابتزاز رفاقة  طيب احه يا عم هو انت مين ولاة مين يعرفك يا عم الحج لا وليك عين تبين وشك تانى اة دا شغل الاخوان المسلمين ما علينا ما علينا  مش عاوز أكمل باقى تعلقاتى وادخل فى مواضيع التحالف وع اى اسس تبنى عشان مقلش أدب اهلى ع حد .يمكن لمي شفت خطاب المرشد وتابعت كلام الاخوان افتكرت لمى كنت فى الجامعة واحنا بيطلع عين أهلننا وطلاب الأخوان المسلمين يهتفو “يا امن يا حبيب احمينا من التخريب ” والنهاردة بيهتفو الأخوان  يا مبارك يا طيار فك عن غزة الحصار طيب احه يا جماعة بجد ياله مش هد خل فى تفاصيل تانى مش ازمة يعنى طيار ولاة عميل الاستعمار كلها عند الفلاشين جماهير وكلها عند الادمغه شعارات بس استوقفني مشهد لواحدة بتقول للمتظاهرين وهما بيصرخو “حسبنا الله ونعم الوكيل “بتقولهم” اتكلم عن لقمة العيش !” حاجات كتير استوقفتني وأنا فى غرفة الحجز بدأنا طبعا التعارف وكل اخوانى كان يقول أخوكم فى الله فلان وعندي كذا من الأولاد يحفظون كذا من القران وميقلش اى تعليق او اى حاجة ، جه دورى فقلت اشتراكى وباحث وبتفق مع كل ابناء وطنى وعروبتى وكل انسان فى الدفاع عن حقوقنا فى خبز وحرية لكل الشعب لا ولكل انسان  وضد الاستعمار والصهيونية والاستغلال بداو الاغانى والأناشيد والكلمات وكان بين كل كلمة وكلمة مقطوعة من أغنية او قصيدة أقولها  حتى إننا هتفنا مع بعض  هتفت الجدع جدع والجبان جبان يالة يا جدع ننزل الميدان وهما بيرددو وبعدها  اطلق كلابك فى الشوارع واقفل زنازينك علينا الخمارات جنب المصانع والسجن مطرح الجنينة  وهما مبسطين بالاغانى دى وجديد الخطاب اللي بيسمعوة، اكتشفت انهم  لا إخوان ولاة غيرة ناس بسيطة جدا ولكن  برغم بسطتها الا انها مومنه جدا باللى كانت ناوية تعملة النهاردة نصرة الإسلام والمسلمين فى غزة !  أتكلمت في وسطهم “اخوانى ورفاقى زى ما طلعنا النهاردة لنصرة الشعب الفلسطينى ورفع الحصار عن غزة لازم نتحرك فى قضايا الوطن قضية فلسطين مش بعيدة عن قضايا الوطن زى ما قضية الحرية والخبز واكل العيش هى قضية محورية ومهم لازم نقف مع مع أخونا عامل المترو لمي يحتج ويعتصم ويضرب ويطالب بالحافز واجر عادل ” كان احد الاخوان من عمال المترو “  ونقف جنب عمال برج العرب”كان فى عامل من عمال برج العرب” اللى بيعيشو فى ظروف صعبة وظروف عمل ظالمة وكذلك ايضا ضد المحاكمات العسكرية وقضايا الحريات  بشكل عام ، وعشان ننجح فى نصرة اى قضية  او نحقق اى نجاح لازم مننساش او نسقط قضاينا قضايا الخبز والأجور وتدنيها  فى ظل ارتفاع الأسعار فوجئى الاخوان  بان هذا الخطاب جديد عليهم لمحت ذلك فى أعينهم ولمحت دة برضو وهما مشددين  وبيهتفو معيا  صحيح  فى تلاتة اعترضوا عشان سخونة هتاف واطلق كلاب فى الشوارع وقالو عاوزين نطلع بالسلامة ومش نزعل حد لكن دة ماثرش على الجو اللى كنا فيه  . حتى العساكر لمي حد كلمهم من الأخوان  وقلهم انتو زعلانين من كلامنا قالو لا  فهتفنا ليهم “والعسكري مظلوم فى الجيش ياكل عدس ويلبس خيش  فضحكوا  ولمى عدنا اغنية  “الجدع جدع صقفو  وضحكوو  نسيت اقول طبعا انى قرفت العسكرى كل شوية اقوله هات اولع مش  معاى كبريت ست سبع مرات كدة لمى طفش وكل مرة يقابل المسالة بتفهم وابتسام  سمع خطبة عن اضراب العساكر وتحركات جنود الامن المركزى سنة 1986 حس انى مش مخبى خنجر ضدة  وطبعا كل اللى كنت معهم اخوان 45 اخوانى بالصلاة ع النبى طلعنا كانت تجربة وضحت مدى نقاء كوادر الأخوان وإخلاصهم خاصة سأكنى الأقاليم كان فى ناس من اطسا الفيوم ومن سمنود غربية ومن الإسكندرية وكلهم مشحونين عشان التظاهرة عشان غزة لكن من خلال تأمل سريع تلقى ان اليسار فى معظم ممارساته مش بيعمل تراكم واغلب تحركات هى جمل ثورية وتحركات ليها طابع فلاشى كلى أمل ان التحالف الاشتراكي واليسار بكل فصائلة اللي كونت التحالف تنسى وتترفع عن المسائل التافه وتهتم بقضايا حقيقة ومهمة واننا نراكم ونشتغل زى ما قال لينين العظيم ” العمل الثورى هو العمل المنظم مع الجماهير بشكل يومى  وزى ما اكد جيفارا بان العمل السياسي بدون تنظيم سرعان ما يتبدد كفقعات الهواء .  

Advertisements

رد واحد to “فلاشية اليسار والجمل الثوريه والوردانى وسيرة حدتو”

  1. عمرو يوسف يناير 29, 2008 في 8:36 م #

    تجربتك اللي حكيتها فيها تشابه بين تجربتي يوم الأربعاء 23/1/2008 لما اتقبض عليا قبل مظاهرة التحالف الأشتراكية. وفوجئت اني مع 44 اخواني وواحد صاحبي جه غلط.
    رغم اختلاف الأخوان اللي قابلتهم عن الأخوان اللي كنت معاهم فانا كنت مختنق فعلا في التجربة من اول السجاير حرام الىربع ساعة قرآن و ادعية قبل الغدا الى ان فكرة الأعتصام حرام واني مغنيش للشيخ امام لأن الغنا برضه حرام.
    الجميل في كلامك هو كلامك عن اللي يخرج من المعتقل ويعمل فيها بطل. كأنه حرر القدس و عمل على رخاء الكون ونجح ودي شخصيات انا قابلتها قبل كده في الحبس برضه وكانوا سيئين منهم واحد كان ماشي يقول انا شيوعي. انا صحيح من حقي اعترف بأني يساري بس مش بطريقة أستعراضية و قعد يتكلم على نفسه مع الظباط كانه بطل المعارضة بل انه هو المعارضة نفسها.دي شخصيات ياريت يعملوا لها حبس تاني وكفاية علينا عقاب الحبس اللي محدش مصدق انه مش زي زمان من اهلي.
    انا عن نفسي لو قالوا لي أتفضل أرجع تاني و اتقبض عليك هرجع تاني مع تمسكي الشديد بأني ميتقبضش عليا لأن محدش يحب يتحبس. و انا اللي يسعدني اكتر اني اعمل تغيير و انا بره بدل ما يخسر رفقائي جهودي و انا جوا. على العموم تجربة الحبس مفيدة في التعرف على ناس جداد وهي في حد ذاتها تجربة تقوي الشخصية وتعزز الثقة في النفس زيادة ده رد فعلي الشخصي.

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

WordPress.com

WordPress.com is the best place for your personal blog or business site.

اللجنة الوطنية للتصدى للعنف الطائفى

لا للطائفية .......نعم للدولة المدنية

%d مدونون معجبون بهذه: